பாகிஸ்தானின் புதிய பிரதமரான ஷாகித் ககான் அப்பாஸியின் 47 பேர் கொண்ட அமைச்சரவையில் 65 வயதான தர்ஷன் லால் என்பவர் அமைச்சராக இடம்பெற்றுள்ளார். இவர் இந்து மதத்தை சேர்ந்தவர். 20 ஆண்டுகளுக்கு பிறகு பாகிஸ்தானில் ஒரு இந்து அமைச்சராக நியமிக்கப்பட்டுள்ளார்.
சிந்து மாகாணத்தில் மிர்புர் மாதெல்லோ எனும் மாவட்டத்தைச் சேர்ந்தவர் தர்ஷன் லால். இவர் மருத்துவராக பணியாற்றியவர். 2013 ஆம் ஆண்டில் சிறுபான்மையிருக்காக ஒதுக்கப்பட்ட தொகுதியிலிருந்து பாகிஸ்தானின் தேசிய சட்டசபைக்கு தேர்ந்தெடுக்கப்பட்டிருந்தார். அவர் நவாஸ் ஷெரீஃப் கட்சியான பாகிஸ்தான் முஸ்லிம் லீக் (நவாஸ்) கின் சார்பாக போட்டியிட்டார். இப்போது அவருக்கு மாகாணங்களுக்கு இடையிலான ஒருங்கிணைப்பு அமைச்சகத்தின் காபினட் அமைச்சர் பதவி வழங்கப்பட்டுள்ளது.
இதற்கு முன்னர் ராணா சந்தேர் சிங் எனும் பாகிஸ்தான் மக்கள் கட்சித் தலைவர் (பெனாசிர் பூட்டோவின் கட்சி) காபினட் அந்தஸ்தில் அமைச்சர் பதவி வகித்திருந்தார். அவர் உமேர்கோட் எனும் தொகுதியிலிருந்து 1977 முதல் 1999 வரை ஏழுமுறை தேர்ந்தெடுக்கப்பட்டவர் ஆவார்.
