எம்.ஜி.ஆர். அம்மா தீபா பேரவை பொதுச்செயலாளர் ஜெ.தீபா, தனது பேரவையை முறையாக பதிவு செய்ய தவறிவிட்டார் என்றும், பேரவை பதிவு செய்துவிட்டதாக கூறி உறுப்பினர் விண்ணப்பங்களை விற்பனை செய்த வகையில் ரூ.20 கோடி மோசடி செய்துள்ளார் என்றும், அவர் மீது சட்டப்பூர்வ நடவடிக்கை எடுக்கும்படியும் தீபா பேரவையை சேர்ந்த நெசப்பாக்கம் ஜானகிராமன் என்பவர் மேற்கு மாம்பலம் போலீசில் கடந்த 20–ந்தேதி புகார் கொடுத்தார்.
இந்தநிலையில் மேற்கு மாம்பலம் போலீசார் இந்த வழக்கை விசாரிக்க தொடங்கினர். சென்னை தியாகராயநகர் சிவஞானம் தெருவில் உள்ள ஜெ.தீபா வீட்டுக்கு போலீசார் சென்றனர். அங்கு பேரவை முறையாக பதிவு செய்யப்பட்டதா? என்பது முதல் விண்ணப்ப படிவ விற்பனை வரை ஜெ.தீபாவிடம் போலீசார் விசாரித்தனர்.
மோசடி புகார் கொடுக்கப்பட்டு உள்ளதால் எப்போது வேண்டுமானாலும் விசாரணை நடத்தப்படும் என்றும் தகுந்த ஒத்துழைப்பு தரவேண்டும் என்றும் ஜெ.தீபாவிடம் போலீசார் கூறியுள்ளனர். 1 மணி நேரம் விசாரணை முடிந்த பிறகு அங்கிருந்து போலீசார் சென்றனர்.
அதனைதொடர்ந்து தீபா செய்தியார்களிடம் கூறியதாவது:
போலியான குற்றச்சாட்டை முன்வைத்து காவல்துறையினர் விசாரணை நடத்துகின்றனர். இதை சட்ட ரீதியாக சந்திப்பேன். அதிமுகவின் இரு அணிகள் இணைந்தாலும் தமிழகத்தில் நல்லாட்சியை கொடுக்க முடியாது.
இவ்வாறு அவர் கூறினார்.
